Patuloy na umaagapay ang Caritas Manila sa mga naging bahagi ng scholarship program lalo na sa mga nawalan ng hanapbuhay dahil sa pandemya.

Ito ang tiniyak ni Ray Angelo Reyes, program officer ng Caritas Manila Scholars Association o CAMASA, matapos ilan sa mga nakapagtapos sa Youth Servant Leadership Educational Program o YSLEP ang naapektuhan ng Covid19 crisis.

Inihayag ni Reyes na nagsasagawa sila ng pakikipag-ugnayan sa mga pribagong kumpanya upang mabigyan ng pagkakataon ang mga YSLEP graduate na makahanap ng mapapasukang trabaho.

“Marami po ang nawalan ng trabaho kaya ang camasa nakipag ugnayan sa iba’t-ibang kumpanya” pahayag ni Reyes sa programang Caritas in Action sa Radio Veritas 846.

Aminado si Reyes na ilan sa mga naging scholars ng Caritas Manila ang hindi nakaligtas sa dagok na dala ng pandemya.

“Actually talagang madami din naapektuhan na mga CAMASA members natin nitong pandemic, may ilan din na pumanaw dahil dito then yun ‘balik handog’ ng mga Scholars natin marami sa kanila ang hindi muna nakapagbigay”.

Magugunitang hinihikayat ng Caritas Manila ang mga nagsipagtapos sa scholarship program nito na magbahagi din ng tulong sa mga kasalukuyang scholars kapag makahanap ng trabaho o makaluwag sa buhay.

Ang scholars ng nasabing social arm ng Arkdiyosesis ng Maynila ay nagmumula sa mga tinatawag na ultra poor families o mga kumikita lamang ng mababa pa sa 10, 000 piso kada buwan ang kani-kanilang mga magulang.

Sa kasalukuyan ay nasa 4,639 na mga mag-aaral sa kolehiyo ang tinutulungan ng Caritas Manila hindi lamang sa Metro Manila kundi maging sa mga malalayo at mahihirap na probinsya. habang nasa mahigit 10 libong graduates na ang miyembro ng alumni association nito.

Rowel Garcia

By Rowel Garcia

Rowel Garcia Disaster Coordinator