Economics

Pagsasabatas ng death penalty, labag sa International covenant.

Naninindigan si Commission on Human Rights Spokesperson Atty. Jacqueline De Guia na pagsira sa kasunduan sa International Covenant Civil and Political Rights (ICCPR) ang muling pagsasabatas ng parusang kamatayan sa bansa.

Ayon kay De Guia, makakaapekto sa kredibilidad ng Pilipinas at magkakaroon ng implikasyon sa iba pang mga kasunduan sa larangan ng ekonomiya at politika kung sisirain ng pamahalaan ang kasunduan sa ilalim ng Second Optional Protocol of the International to the ICCPR na nagbabasura ng death penalty.

Aniya, repleksyon din ng pagsusulong ng death penalty na hindi epektibo ang criminal justice system ng bansa kung saan mga mahihirap ang pangunahing maaapektuhan.

Naniniwala si De Guia na kailangang tutukan at palakasin ang sistema ng hustisya sa bansa gayundin ang pagtiyak ng pulisya na hindi na maipagpatuloy pa sa loob ng kulungan ang paggawa ng illegal na gawain ng mga nahuli.

“Lumalabas na ang pangunahing problema po dito ay ‘yung ating criminal justice system dahil mabagal po ang ating usad. Ang sagot po bukod sa effective justice system ay yung effective law enforcement system dahil hindi po magpapatuloy ang droga at krimen sa ating bansa kung sisiguraduhin ng ating pulisya na lahat ng nagkakasala ay mahuhuli nila,” dagdag pa ni De Guia.

Sa pinakahuling tala ng Amnesty International, 104 bansa ang nagpawalang-bisa na ng parusang kamatayan kung saan magugunita na naging kauna-unahan ang Pilipinas sa buong Asya na nagtanggal ng death peanlty sa pamamagitan ng 1987 Constitution.

Sa katuruang panlipunan ng simbahang kataloika, malinaw na nasasaad na ang pagpatay ay paglabag sa sampung utos ng Diyos.