500 Years of Christianity Countdown

Nagpaabot ng pagbati ang Obispo ng Diocese of Kidapawan sa bagong hirang na Cardinal ng Pilipinas na si Cardinal-elect Capiz Archbishop Jose Advincula.

Ayon kay Kidapawan Bishop Jose Colin Bagaforo, National Chairperson ng NASSA / Caritas Philippines, isang magandang balita ang pagkakahirang ng Kanyang Kabanalan Francisco ng bagong Cardinal ng Pilipinas mula sa Archdiocese of Capiz.

Itinuturing ito ni Bishop Bagaforo na isang sorpresa at pagpapamalas ng pambihirang paggabay ng Espiritu Santo sa Simbahang Katolika maging sa gitna ng krisis na dulot ng pandemya.

“Congratulations kay Cardinal Elect Joe Advincula!! Talaga naman po marami sa atin ang nagulat sa pagkapili ng ating bagong Cardinal mula sa Archdiocese of Capiz. Talaga nga naman na ‘the holy spirit moves sometimes in unexpected ways…’ pahayag ni Bishop Bagaforo sa Radio Veritas.

Inihayag ng Obispo na isang karangalan para sa Pilipinas at sa buong Panay island ang pagkakaroon ng bagong Cardinal mula sa kanilang hanay.

Ipinaliwanag ni Bishop Bagaforo na ang mga Cardinal ay nagsisilbi rin bilang “Pope’s Advisers” kung kaya’t dahil sa pagkakahirang kay Cardinal-elect Advincula ay higit pang madadagdagan ang kamalayan ng Holy See at ng Santo Papa Francisco sa tunay na kalagayan ng mga Katoliko hindi lamang dito sa Pilipinas kundi maging sa buong Asya.

“Malaking karangalan po sa Pilipinas at now in Capiz Archdiocese and the whole of Panay island for this honor of having a Cardinal mula sa kanilang hanay. Cardinals are “Pope’s Advisers” and so lalo pang madagdagan ang knowledge ng Seat of Peter tungkol sa kalagayan ng mga Pilipino at dito sa Asia.” Dagdag pa ni Bishop Bagaforo.

Si Cardinal-elect Advincula na mahigit 8-taon ng nagsisilbi bilang Arsobispo ng Capiz ay isa sa labing tatlong iba pa na itinalaga ng Kanyang Kabanalan Francisco bilang mga bagong Cardinal ng Simbahang Katolika.

Naunang ikinatuwala ni Balanga Bishop Ruperto Santos ang pagkakahirang ni Pope Francis kay Cardinal-elect Advincula.

Read: https://www.veritas846.ph/pagkahirang-ng-santo-papa-kay-cardinal-advincula-ikinatuwa-ng-isang-opisyal-ng-cbcp/

Bukod sa pagsisilbi bilang taga-payo at katuwang ng Santo Papa sa pamamahala ng Simbahan sa buong mundo, kabilang din sa mga tungkulin ng mga Cardinal ay ang paghahalal ng bagong Santo Papa bilang bahagi ng College of Cardinal.

Sa kabuuan ang Simbahan ay mayroong higit sa 200-miyembro ng College of Cardinals kung saan 129 ang kabilang sa Cardinal Electors o mga Cardinal na wala pa sa edad 80-taong gulang.