Nag-alay ng Misa para sa mga kaluluwa ng mga napapaslang sa bansa ang Archdiocese of Manila Public Affairs Ministry.

Ayon kay Rev. Fr. Atilano “Nonong” Fajardo, director ng RCAM Public Affairs Ministry, pinangunahan ni Manila Auxiliary Bishop Broderick Pabillo ang Misa na nawa ay matahimik ang mga namayapa na lalo na ang mga napatay sa mga operasyon ng gobyerno laban sa iligal na droga.

Ayon sa pari, partikular na alay ang Misa lalo na ngayong Year of Mercy and Compassion para sa ikapapayapa ng mga kaluluwa na hindi nakapagsisi sa kanilang mga kasalanan noong sila ay nabubuhay pa.

Dagdag ni Fr. Fajardo, ang Misa ay paramdam na rin sa mga kaanak ng mga namatay na hindi sila nag—iisa sa kanilang pighati at may Diyos na handang ibigay ang kapatawaran sa lahat.

“Nag-Misa tayo sa pangunguna ni bishop Pabillo para ipanalangain ang lahat ng namayapa lalo na para sa kampaya sa droga, sinasabi natin na ang mga ito ay di binigyan ng pagkakataon na makapagsisi o makahingi ng tawad, lalo na ngayong Year of Mercy and Compassion na sinasabi natin bigyang ng pagasa at pagkakataon ang bawat isa dahil ang Panginoon ay nandiyan lamang para magbigay sa atin ng kapatawaran. Nagpasalamat sila (pamilya), dahil may nananalangin sa mga kaluluwang napaslang, ” pahayag ni Fr. Fajardo sa panayam ng Radyo Veritas.

Kaugnay nito, ipinanalangin din sa Misa ang mga gumagawa ng iba pang krimen gaya ng pagpatay sa kapwa.

“Ang mga taong ito ay humihingi ng panalangin, di natin sinasabi na yung mga gumagawa ng masama at kung sino-sinong pumapatay na ito, kailangan din natin ipagdasal dahil sila rin ang magbabayad sa mga dugong kanilang pinaslang,” ayon pa sa pari.

Ginanap ang Misa sa St. Vincent de Paul Church, Adamson University, San Marcelino Street, Maynila kahapon, ika – 25 ng Hulyo, 2016 kasabay ng unang SONA o State of the Nation Address ng Pangulong Rodrigo Duterte.

Dumalo sa Misa ang mga kaanak ng mga namatay, mga mamamahayag, mga taong-Simbahan, kabataan, prolife group at iba pang sektor.
Sa sampung utos ng Diyos, ikalima dito ang ‘Huwag Kang Papatay’.

Sa record ng Philippine National Police, mula July 1-21, 2016 halos 300 na ang nasawi dahil sa all-out war ng pamahalaan kontra droga.

Sa SONA kahapon ng Pangulong Duterte, sinabi nitong iimbestigahan at papanagutin ang mga awtoridad na mapatutunayang umaabuso sa kanilang tungkulin lalo na sa mga operasyon kontra droga.