Ipagpatuloy ang pagsisikap para sa Filipinong mag-aaral, mensahe ng obispo sa mga guro - Veritas846
500 Years of Christianity CountdownCountdown

Hinangaan ng opisyal ng Catholic Bishops’ Conference of the Philippines ang mga guro na patuloy na nagsususmikap sa kabila ng krisis na dulot ng pandemic Novel Coronavirus Disease sa bansa.

Ayon kay Manila Apostolic Administrator Bishop Broderick Pabillo na siya ring chairman ng CBCP- Episcopal Commission on the Laity, nakahahanga ang pagsisikap ng mga guro na maipagpatuloy ang kanilang tungkulin bilang tagapagturo sa kabataan sa kabila ng mahirap na sitwasyon na dulot ng pandemya.

Ang mensahe ng obispo ay kaugnay sa paggunita ng National Teachers’ Month mula ika-5 ng Setyembre hanggang ika-5 ng Oktubre.

“Sana po hindi mawala itong ganun hangarin na mag-educate sa mga kabataan natin kahit na panahon ng pandemya,” ang bahagi ng pahayag ni Broderick Pabillo sa panayam sa Radyo Veritas.

Umaasa naman si Bishop Pabillo na patuloy na maging matatag at matiyaga ang mga guro sa pagbabagong hatid ng pandemya maging sa larangan ng edukasyon.

“Talagang yung mga guro sa ngayong panahon ay kailangan mag-adjust marami ay nawalan ng trabaho at marami po ay nahihirapan sa mga online na mga teaching na ito kaya ang aking pagbati sa mga guro, sana maging matyaga sila at maging handa sila sa mga pagbabago na tinatawag ng ating panahon ngayon,” dagdag pa ni Bishop Pabillo.

Pagbabahagi ng Obispo, nawa ay hindi mawala ang pagsisikap ng mga guro na maibahagi ang kanilang kaalaman sa kabataan sa kabila ng mga pagbabagong ipinatutupad upang matiyak ang kapakanan at kaligtasan ng lahat mula sa nakahahawang sakit.

Tema ng National Teachers’ Month ngayong taon ang “Gurong Filipino para sa Batang Filipino”.

Una ng ipinagpaliban ng Department of Education ang pagbubukas ng School Year 2020 – 2021 sa ika-5 ng Oktubre upang mabigyan ng pagkakataon ang lahat na makapaghanda sa bagong paraan ng pagtuturo sa pamamagitan ng blended learning- ang online at modular scheme lalu’t hindi pa pinahihintulutan ang face-to-face classes.

Batay sa tala ng DepEd, may aabot sa 263,000 ang bilang ng mga private teachers sa elementarya at sekondarya habang may 771 guro naman sa private tertiary schools ang pinangangambahang maapektuhan ang kabuhayan.

Ito ay dahil na rin sa dami ng mga hindi nag-enroll sa pribadong paaralan at paglipat sa mga pampublikong institusyon ng may 2-milyong mag-aaral.

Leave a Reply