Cultural

Filipino maging bahagi ng misyon ng Simbahan-Pope Francis

Maging instrumento sa pagbubuo at pagsusulong ng kultura ng pagkakaisa at pakikipagkapatiran sa kabila ng pagkakaiba-iba.

Ito ang paalala ni Sr. Beth Pedernal ng Missionary Sisters of St. Charles Borromeo o Scalabrinians na nakabase sa Roma sa mensahe ng Kanyang Kabanalan Francisco noong unang araw ng Simbang Gabi sa St. Peter’s Basilica na dapat na tumimo sa puso at isip ng mga Filipinong mananampalataya.

Paliwanag ng Madre, dapat ituring na hamon ng bawat isa ang tinukoy ni Pope Francis na misyon ng bawat Filipino na pagpapalaganap ng pakikipagkapatiran hindi lamang sa Pilipinas kundi maging sa iba’t ibang bansa.

“Ang sinasabi niya tayong mga Filipino ay may espesyal na misyon upang magbuo ng isang kultura ng komunyon at daybersidad,” ang bahagi ng pahayag ni Sr.Pedernal sa panayam sa Radyo Veritas.

Pagbabahagi ni Sr. Pedernal, ang misyon ng pagpapalaganap ng mga Filipino ng pakikipagkapatiran ang naipapamalas lalu na ng mga Overseas Filipino Workers sa iba’t ibang bansa kung saan bagamat malayo sa mga mahal sa buhay ay nangingibabaw pa rin ang pananampalataya ng mga Filipino.

Ibinahagi ng Madre ang mariing paniniwala at pagtitiwala ng Santo Papa Francisco sa mahalagang ginagampanan ng mga Filipino upang ipalaganap ang pagkakaisa at pakikipagkapatiran maging sa iba’t ibang mga denominasyon at estado sa buhay.

“Yung komunyon at daybersidad na ito ay nakikita at pinapatunayan natin na sa kabila ng ating pangingibang bansa dala-dala natin ang pananampalataya sinabi nga ng Santo Padre ‘ang inyong pananampalataya ay isang lebeto na kung saan ang kumunidad ng mga Filipino ay nakakaugat sa ngayon, I am encouraging you sabi niya iniincourage ko kayo sabi niya na maging tagapagparami ng mga opurtunidad na kung saan ang kultura ng enkwentro ay maibahagi sa iba sapagkat ito ay unang pagbubuo ng komunyon batay sa pagkakaiba-iba o sa daybersidad”, dagdag pa ni ni Sr. Pedernal.

Matatandaang pinangunahan ng Kanyang Kabanalan Francisco ang pagdaraos ng unang araw ng Aguinaldo Mass o Misa De Gallo na mas kilalang Simbang Gabi para sa mga Filipinong mananampataya sa Vatican.

Isinagawa ang misa sa St. Peter’s Basilica, kasabay ng ikatlong linggo ng adbyento noong ika-15 ng Disyembre ganap na alas-kwatro y medya ng hapon oras sa Roma na dinaluhan ng Filipino community sa bansa.
Ito na ang ika-apat na pagkakataong isinagawa ang Simbang Gabi sa St. Peter’s Basilica para sa Filipino community ngunit sa kauna-unahang pagkakataon ay pinangunahan ito mismo ng Santo Papa.

Bukod sa mahigit 150-mga Pari na nakibahagi ay personal ding dumalo si Philippine Ambassador to the Holy See Grace Relucio-Princesa sa Simbang Gabing pinangunahan ni Pope Francis sa Roma.