500 Years of Christianity Countdown

Nagpahayag ng pakikibahagi ang Commission on Human Rights (CHR) sa paggunita ng Simbahang Katolika ng 33rd National Prison Awareness Week ngayong taon.

Ayon kay CHR Spokesperson, Atty. Jacqueline Ann de Guia, kaisa ng Simbahan ang kumisyon sa pagnanais na mabigyan ng pag-asa ang mga bilanggo lalo na ngayong panahon ng pandemya.

Inihayag ni De Guia na kabilang ang mga bilanggo sa pinakalantad sa COVID-19 at iba pang sakit dahil sa pagsisiksikan ng mga ito sa bilangguan.

“The Commission on Human Rights (CHR) joins the Catholic Church in the Philippines in the observance of the 33rd National Prison Awareness Week from 19 to 25 October 2020. The theme for this year is “Restoring Hope and Healing during this Time of Pandemic through God’s Transforming Unconditional Love.” Protecting communities from infectious diseases means protecting everyone, especially those who are not as able to protect themselves. Vulnerable populations, such as persons deprived of liberty, are often most at risk during public health emergencies. They have fewer protections from an outbreak, and may face more significant fallout from any disruptions in daily life.” pahayag ni de Guia.

Binigyan diin din ni De Guia na bilang lead agency ng Interim National Preventive Mechanism ay nananatili ang paninindigan ng kumisyon laban sa hindi makataong paraan ng pagtrato at pagpaparusa sa mga bilangguan.

Ibinahagi rin ni De Guia ang apela ng kumisyon sa Senado at Kongreso upang maisabatas ng National Preventive Mechanism Bill na naglalayong maisaayos ang kondisyon at kalagayan ng mga bilanggo sa buong bansa na naangkop sa international standards ng United Nations.

Iginiit din ni de Guia na nararapat pahintulutan ang mga bilanggo na makipagkomunikasyon sa pamilya na makatutulong sa kanilang mental health.

Nanawagan din ang C-H-R sa patuloy na pag-usad ng criminal justice system lalu ang mabilis na paglilitis sa kaso ng mga bilanggo upang maiwasan ang pagsiksikan sa mga bilangguan.

Sa tala ng CBCP-Episcopal Commission on Prison Pastoral Care (CBCP-ECPPC) sa mahigit 100-libong mga bilanggo sa buong bansa, tanging 40-libo lamang sa mga ito ang nahatulan sa kanilang nagawang kasalanan at ang iba ay nakapiit habang nililitis ang kaso sa hukuman.

Tema ng 33rd Prison Awareness Week ngayong taon ang “Restoring Hope and Healing during this Time of Pandemic through God’s Transforming Unconditional Love” na gugunitain mula ika-19 hanggang ika-25 ng Oktubre.