Sa kabila ng pandemya ay nagpatuloy ang Archdiocese ng Nueva Segovia sa pagsasagawa ng mga programa na naglalayong makatulong sa mga mahihirap na mamamayan sa probinsya ng Ilocos Sur sa tulong ng Pondo ng Pinoy at Caritas Manila.

Sa panayam ng programang Caritas in Action kay Rev. Fr. Danilo Martinez, Social Action Director ng Caritas Nueva Segovia, ikinagalak nito na sa kabila ng mga pagsubok dulot ng pandemya ay hindi pa rin natigil ang kanilang mga programa para sa mga mangingisda, magsasaka at mga mag-aaral ng Arkidiyosesis.

Ayon kay Fr. Martinez, malaking tulong ang suporta ng Pondo ng Pinoy at Caritas Manila para maipagpatuloy nila ang kanilang mga nasimulang programa.

Inihayag ng Pari na nang magsimula ang mahigpit na pagpapatupad ng lockdown noong nagdaang taon ay nakapagsagawa sila ng mga “relief assistance effort” sa tulong ng dalawang nasabing institusyon.

“Marami na kami natulungan sa program ng Pondo ng Pinoy, una nakapagbigay kami ng babuyan sa mga Parishes, meron din mga community ng mga Madre na kasama yung mga trabahador nila doon sa community, nakapagbigay na din kami ng computer set sa different Chapels ng mga schools sa Archdiocese and at the moment under implementation yung pagbibigay namin ng fishing equipment sa isang island ditto. Pondo ng Pinoy gave us an amount during the pandemic kaya nagpapasalamat kami sa Pondo ng Pinoy ganun na din sa Caritas Manila at Radyo Veritas dahil sa kanilang tulong sa mga nangangailangan” dagdag pa ng Social Action Director ng Archdiocese of Nueva Segovia.

Umaasa si Fr. Martinez na mas mapapalakas pa nila ang pagtulong sa mga nangangailangan lalo na’t marami pa din ang lumalapit sa kanila dala ng kahirapan.

Ang Pondo ng Pinoy ay patuloy na tumutulong sa iba’t-ibang Diyosesis sa Pilipinas sa pamamagitan ng mga bente singko sentimos na nalilikom sa mga paaralan at mga parokya habang ang Caritas Manila ay nagpapatuloy din sa pagsasagawa ng mga donation drive para sa mga programa sa mga mahihirap at naapektuhan ng kalamidad.

Rowel Garcia

By Rowel Garcia

Rowel Garcia Disaster Coordinator